SELOS ang gilantaw sa mga awtoridad nga motibo sa pagdinunggabay sa mag-live-in partner ala 1:00 sa hapon, Dominggo, Oktubre 6, 2024, sa General Santos City.
Mga mag-live-in partners pulos patay sa hitabo nga giilang sila Rebecca Campon Tanbon, 40-anyos, ug si Raymond Pagtulonan, 30-anyos, mga molupyo sa J-Lansang Village, Barangay Lagao, General Santos City.
Sumala ni Jenna nga ig-agaw ni Rebecca nga iyang nadungog nga grabe ang panaglalis sa duruha gumikan sa ilang personal nga problema.
Taud-taod lang nakadungog na pud si Jenna og sininggitay nga nisampot sa dinunggabay sa mag-live-in partners gamit ang mahait nga kutsilyo.
Gisapupo ang mga samaron nga mag-live-in partners sa ilang mga paryente ug silingan ug gidala ngadto sa balay tambalanan apan pulos gideklara sa mga doktor nga duruha nga patay na.
Dunay tulo ka samad dinunggaban sa liog si Rebecca samtang usa sa dughan kang Raymond nga maoy hinungdan sa ilang kamatayon. (EEF)