Magsuong napaig sa sunog PWDs

Magsuong napaig sa sunog PWDs
Hulagway gikan sa Davao City Police Office

NAGSUBO ang pamilya Romero sa Barangay Saloy, Calinan District, Davao City human duha sa ilang mga bata napaig sa natigayong sunog alas 6:00 sa gabii niadtong Lunes, Enero 8, 2024, sa ilang panimalay sa Purok Kaunlaran.

Si Davao City Police Office (DCPO) spokesperson Police Captain Hazel Tuazon nag-ila sa mga biktima nga sila Lex Romero, 14-anyos, ug Loygie Romero, 13-anyos, magsuon.

Saysay sa silingan sa mga biktima nga si Sergio Suarez nakurat siya sa dihang iyang nakita nga misilaob na ang balay sa pamilyang Romero.

Daling nangayo'g tabang si Suarez sa mga silingan, apan higayon nga wala sab diha ang ilang mga silingan lakip ang ginikanan sa mga biktima.

Sa pasiunang imbestigasyon sa homicide and arson section (HAS) sa Calinan Police Station, nasayran nga nahinanok na sa pagkatulog ang duha ka bata nga nabiyaan sa ilang mga ginikanan.

Nahinabi sa Radyo 5 Davao ang mga ginikanan sa mga biktima kagahapon diin nasayran suma sa inahan nga milakaw siya gumikan nag-asikaso sa mga papeles paingon sa abroad.

Nasayran sab nga ang amahan nga si Eliseo, miadto sa balay sa namatay nga igsuon kay nitabang og ihaw sa baboy sanglit ilubong ang igsuon kagahapong adlawa, Enero 9, 2024.

Sumala sa ginikanan nga si Lyn, mga persons with disabilities (PWDs) ang iyang mga anak kinsa parehong adunay sakit sa bukog ug dili normal ang paglakaw nga maoy nakitang hinungdan nga wala kini nakagawas sa balay dihang miulbo ang kalayo.

Dugang sa paghinabi sa Radyo 5 ngadto sa ginikanan nga nahabilin sa balay ang upat ka mga anak, apan ang ikatulo ug ikaupat miapas sa amahan sa namatyan rason nga ang duha ka PWDs nga mga anak na lang ang nahabilin sulod sa balay dihang nasunog.

Sa kapaspas sa kalayo nga mikanit sanglit gama sa light materials ang balay sa mga biktima, wala na nakagawas pa ang mga bata, hinungdan sa ilang kamatayon.

Pagkahuman sa sunog, nakita na lang ang duha ka patay’ng lawas sa mga bata nga nangapaig.

Sumala ni Fire Officer (FO) 3 Jason Iguana sa Bureau of Fire Protection (BFP) Davao nga alas 8 na sa gabii nadeklara nga under-control ang sunog.

Wala pa’y matumbok nga hinungdan sa kalayo ang kabomberohan samtang anaa sa P55,000 ang gibana-bana nga danyos sa sunog.

Igo na lamang sa pagbasol ang mga ginikanan, diin plano niini karon nga ipalubong diretso ang mga bata. Nangayo sab kini og tabang pinansiyal sa publiko sanglit pit-os ang ilang kahimtang. (Jeepy P. Compio uban sa taho sa Radyo 5 Davao)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph