BANSALAN, Davao del Sur — Hustisya ang singgit sa pamilya sa PE Teacher nga si Evangeline Aromin nga gilubong adlaw nga Martes, Disyembre 12, 2023 sa Barangay New Clarin.
Mitulo ang luha ug nagbangutan ang mga kabanay ug mga kaila ni Evangeline nga ilang giila nga bright, kugihan ug buotan.
Ang iyang amahan, si Quintine Aromin, nagbangutan usab sa sayo nga pagkamatay sa iyang kamanghuran nga anak.
Bisan gidawat niya ang giantos sa iyang anak, mihangyo si Quintine sa mga awtoridad nga madakpan ug masilutan ang tanan nga dunay kalabutan sa pagpamomba.
Kahinumdoman nga upat ang patay nga gilangkuban sa duha ka magtutudlo ug duha ka mga estudyante atol sa pagpamomba sa MSU Marawi City.
Muabot sab sa 47 ang naangol diin unom nila hangtud karon ang anaa sa balay tambalanan.
Tulo na ka suspek ang nadakpan sa SITG-Marawi nga mga sakop sa Maute-ISIS Terror Group nga positibo nga gitudlo sa mga testigo.
Sa kasamtangan gipalig-on pa sa mga pulis ug mga sundalo ang paglutos sa mga terorista.