KIDAPAWAN CITY - Tagaan og ganti ang bisan kinsa nga makatudlo o makahatag og impormasyon nga nalambigit sa drag race sa probinsiya sa Cotabato.
Kini maoy usa sa mga sugyot aron mapakgang na ang drag race sa probinsiya sa gihimong Peace and Order Council Executive Committee Meeting.
Ang tigum gipangunahan mismo ni Cotabato Governor Emmylou "Lala" Taliño-Mendoza, uban nila Boardmember Sittie Ejorie Antao-Balisi ug kanhi Boardmember ug karon Provincial Advisory Council Member Shirlyn Macasarte-Villanueva, apil ang mga opisyal sa lokal nga kagamhanan sa Libungan kung diin duha ka kinabuhi ang nakalas ug laing usa ang grabeng naangol sa drag race bag-ohay pa lang.
Gawas sa sugyot nga paghatag og ganti, nasabutan sab ang pagbutang og tulo ka dugang choke points gikan sa Barangay Ulamian paingon sa Batiocan sa Libungan nga dumalahon sa kapulisan ug Barangay Peacekeeping Action Team (BPAT); pag-amendar sa kasamtangang ordinansa pinaagi sa pagdugang og silot sa mga drag racers, mga tag-iya og motorsiklo nga nalambigit ug mga indibiduwal nga mopusta; pagpalig-on sa trap operation sa pulis, militar ug Land Transportation Office (LTO); pagsakmit sa modified ug unregistered nga mga motorsiklo; ug pagpatuman sa speed limit sa pipila ka mga lugar.
Busa nanawagan si Governor Mendoza sa mga law enforcers, ingon man sa katawhan sa probinsiya nga magtinabangay ilabi na sa suliran sa drag race diin kasagaran sa mga nalambigit niini mga batan-on nga wala pa'y mga drivers license.
Gipahinumdoman usab niya ang mga ginikanan nga bantayan ang kalihokan sa ilang mga anak aron malayo sa dautang impluwensiya sa mga higala, bisyo ug kadaut.
Samtang mapasalamaton sila si Libungan Mayor Angel Rose L. Cuan ug Bise Mayor Jimboy Fullecido sa mga opisyal sa probinsiya sa daling pagtubag sa ilang hangyo nga masolusyonan ang problema sa lungsod. Lakip sa nitambong sa tigum mao ang mga representante gikan sa Philippine National Police (PNP) ug Armed Forces of the Philippines (AFP).