MAGUINDANAO DEL SUR — Nanghikling ang mga sibilyan sa gilusad nga opensiba sa militar batok sa Dawlah Islamiyah Group sa Pagalungan, Maguindanao del Sur alas 4 sa kaadlawon, Huwebes, Disyembre 7, 2023.
Target sa operasyon mao ang Liguasan Marshland, partikular sa try-boundary sa Pikit Cotabato, Pagalungan ug Datu Montawal Maguindanao del Sur nga gituohang balwarte sa mga terorista.
Dungan nga gilusad sa militar ang air-to-ground assault batok sa mga terorista nga nakig-alayon sa BIFF.
Mabatian ang kusog nga pagbuto sa pipila ka bahin sa North Cotabato, Pagalungan ug Datu Montawal Maguindanao del Sur.
Sa pakighinabi kang 602nd Brigade Civil Military Operation Officer Captain Dexter Ruma, target nila ang grupo nga nalambigit sa nagkalain-laing krimen sa North Cotabato sama sa bus bombing sa miaging tuig.
Gipahibalo ni Duma ang katawhan sa maong dapit nga magbinantayon ug muhikling kung sila duol sa dapit nga target sa operasyon sa militar aron malikayan nga sila maangin.
Gipahinumdoman usab ang publiko nga mag-amping batok sa posibleng diversionary tactics sa mga terorista sa mga dapit nga daghang tawo sama sa mga merkado, bus terminal, simbahan ug mosque ingon man plaza, ilabi na sa mga bus de pasaheroan.
Sa kasamtangan dili pa matino ang mga napatay ug naangol sa air-to- ground assault sa Joint Task Force Central nga gipangulohan ni 6th ID Chief Major General Alex Rillera.