Mipatay sa 2 babaye nasudlan og dautang espiritu?

Mipatay sa 2 babaye nasudlan og dautang espiritu?
Gipaambit nga hulagway.

SANGKO sa langit ang pagmahay sa suspek nga si Marcial Gonzales, 52-anyos human niya napatay ang duha ka babaye nga iyang ka-boardmate alas 7 sa buntag, Huwebes, Enero 4, 2024 didto sa No.33, Purok 1, Brgy. 2-A, Davao City.

Sa eksklusibong pakighinabi sa Radyo 5 Davao gisaysay sa suspek nga bisan pa og mangayo siya’g pasaylo ngadto sa mga kabanay sa biktima, apan wala na siya’y mahimo kay dili gayod siya mapasaylo.

“Bisan pa og mangayo kog pasaylo, dili na mahitabo nga pasayluon ko, nahimo naman nako… sangko sa langit akong pagmahay, wala napod ko kabalo sa akong nahimo atong mga orasa,” saysay sa suspek.

Gitug-an sab sa suspek nga hubog pa sab siya nga miuli sa iyang giabangan nga boarding house, ug iyang nakita nga nanggihigda pa ug tulog ang mga biktima nga sila Jessel Joy Casantao Indoy, 15-anyos ug Cora Oral Ansagit, 20-anyos.

Niya pa nga daw nasudlan siya’g espiritu sa satanas niadtong mga taknaa nga nakita ang mga batan-ong babaye.

“Gikuha dayon nako ang kutsilyo sa akong kuwarto dayon gipangdunggab nako sila, wala na gyod ko kabalo sa akong gihimo, mora kog nasudlan og espiritu sa satanas,” ingon sa suspek.

Giingon sab sa suspek nga siya ang hinungdan nganong diha namuyo ang duha ka biktima sa pikas kuwarto.

“Akoy dahilan diha sila namuyo, kay ako man nag-renta diha, tapos gipapuy-an nalang nako sa ilaha ang pikas kuwarto, tag P15 ang adlaw, nakaila na nako sila sa palengke sa Bankerohan, wala man daw sila’y mapuy-an,” saysay sa suspek.

Dugang sa suspek nga diha’y mga gabii nga mapungot siya gumikan sabaan suma pa ang duha ka biktima labi pa kung mangdala sa ilang giingong mga uyab.

“Ginabadlong nako sila sa ilang kasabaan, labi na og mandala sila sa ilang mga uyab, perteng sabaa,” ingon sa suspek.

Miyerkules sa gabii, Enero 3, nagkigtagay ang suspek sa iyang barkada nga mga laborer sa Metro Circle sa Bankerohan, diin lango pa sa ilimnong makahubog ang suspek nga miuli sa iyang giabangan sa Brgy. 2-A.

Human iya napatay ang duha, miingon pa kini sa mga silingan nga manawag na kuno’g 911 kay iyaha na nga napatay ang duruha.

Gipailawom pa sab sa autopsy ang patay’ng lawas sa duha ka mga biktima aron masuta basin unya og napanamastamasan sanglit nahubo na ang pang-ubos nga bisti sa usa, samtang ang usa nahubo ang pangtaas nga sapot.

Nadakpan ang suspek pinaagi sa joint-operation sa awtoridad sa Davao Region didto sa terminal padung sa Kapatagan sa Digos City, pipila ka oras human ang kremin, Enero 4.

Nasakaan na og kasong murder Enero 5, 2023 ang suspek sumala ni San Pedro Police Station, commander Police Major Marvin Hugos. 

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph