Nagbanhig sa kapitan, asawa gihap-an

NAGLUSAD na og manhunt operation ang kapulisan sa Marilog Police Station (PS12) sa 2 ka mga suspek nga nagbanhig sa barangay kapitan sa Salumay, Marilog District, Davao City, kauban ang iyang asawa bandang alas 7:50 sa buntag Martes, Septyembre 3, 2024, sa Purok 1, Barangay Salumay sa maong distrito.

Mga biktima giila nga si Lito Mansamo, 47-anyos, kapitan sa Barangay Salumay ug iyang asawa nga si Alma, 45-anyos, pulos molupyo sa Sitio Patag, Salumay, Marilog District, Davao City.

Giingong human madawat sa Marilog PNP ang impormasyon gikan sa Central 911 bahin sa giingong pagpamanhig sa nahisgutang dapit, dali dayon kining girespondehan sa kapulisan.

Nasayran nga mga biktima sakay sa ilang Mitsubishi Triton pickup nga naglabigar gikan sa Sitio Patag Road padulong sa Davao-Bukidnon National Highway.

Apan sa dihang niabot sa kurbadang bahin sa dalan, partikularmente sa Purok 1 sa Barangay Salumay sa nahisgutang distrito, duha ka wala mailhing suspek kinsa nagsul-ob og bonnets nibabag sa ilang agianan ug gibanhigan gamit ang gituohang M16 Armalite rifle ug 9mm pistol.

Atol sa pagbanhig, samdan si Alma sa iyang tuong tuhod apan walay tatsa ang kapitan sa maong hitabo. Samtang mga suspek yano na lang nga nisibat nga nagbaktas padulong sa wala masayring direksiyon sa lugar.

Sa pagsuwat ning balita, padayon pa ang gihimong imbestigasyon sa kapulisan Marilog PNP aron nga mailhan ug madakpan nga mga responsable sa pagpamanhig. (WGM)