KIDAPAWAN CITY -- Gisang-at na ang kasong pagpatay sa suspek nga namusil atol sa gipahigayon nga pamalaye alas 2:00 sa hapon, Dominggo, Septyembre 29, 2024, sa Makilala, probinsiya sa Cotabato.
Giila ang biktima nga si Victor Bama Jr., 39-anyos, minyo, factory worker ug nagpuyo sa Purok 1B, Barangay Luayon, Makilala.
Samtang ang suspek mao si Dodong Alacayde, 34-anyos, minyo ug molupyo sa Sitio Bagong, Barangay Luayon sa maong lungsod.
Sumala ni Cotabato Provincial Police Office Director Colonel Gilberto Tuzon nga miuban ang biktima sa iyang mga paryente sa pamalaye sa Sitio Bagong, Barangay Luayon apan wala magkasinabot ang pamilya sa ulitawo ug dalaga.
Atol sa ilang pagpanguli, kalit lang gipusil sa suspek ang amahan sa ulitawo apan ang bala sa pusil didto miigo sa biktima.
Abtik sab nga miikyas si Alacayde paingon sa hilit nga dapit sa Barangay Luayon, Makilala.
Gisapupo sa iyang mga paryente si Bama ug gidala sa balay tambalanan apan gideklara kini sa doktor nga dead on arrival tungod sa igo sa iyang ilok.
Samtang wala madugay, boluntaryo nga misurender ang suspek sa kapulisan sa Makilala Municipal Police Station ug gipasakaan dayon og kasong pagpatay. (EEF)