NANIYUTRALISA sa kapulisan ang usa ka lalaki kinsa giingong nangpanghasi gamit ang pistola alas 9:55, Sabado sa gabii, Pebrero 17, 2024 didto sa Purok 1, Open Canal, Brgy. 23-C, Isla Verde Davao City.
Dead on arrival sa Southern Philippines Medical Center (SPMC) ang suspek nga giila sa kapulisan nga si Roy Casas, alyas Bobong, 47-anyos, taga Brgy. 26-C, Lizada Street ning siyudad sa Davao.
Subay sa report sa Sta Ana Police Station 1, midangop sa ilang buhatan ang usa ka Alejandro Dela Cuesta aron nga magpatabang kay giadtoan siya sa suspek didto sa iyang balay kinsa giingong gihasi ug gitionan og pistola.
Sa pagresponde sa kapulisan ilang nakita ang suspek sa Purok 1 Open Canal, ug sa dihang nakabantay ang suspek sa mga pulis, kuyog si Dela Cuesta, kalit kining mibunot sa iyang pistola dayon pusil ngadto sa otoridad hinungdan nga mibalos ang mga pulis.
Alas 10:10 sa gabii sa samang adlaw, nabugtoan sa kinabuhi ang suspek didto sa SPMC.
Narekober sa crime scene ang usa ka caliber .38 nga revolver ug tulo ka mga fired cartridge niini.