'Nanglungkab' og motor sa sundalo sikop

'Nanglungkab' og motor sa sundalo sikop

DAVAO DEL NORTE -- Gibitbit sa sundalo ngadto sa istasyon sa kapulisan ang 29-anyaos nga lalaki human nasakpan nga maoy nanglungkab sa iyang motorsiklo nga giparada sa Tagum Public Market sa Purok Bayanihan, Magugpo West, siyudad sa Tagum.

Ang suspek nailhan nga si Jema Isidro, minyo, drayber sab og single motorcycle ug molupyo sa Teacher Village, Magugpo South, Tagum City.

Subay sa report gikan sa awtoridad, alas 4:30 sa hapon niadtong Biyernes, si Police Staff Sergeant Ryan Juan, uban sa reklamante nga si Nazir Baya, 31, minyo, sakop sa Armed Forces of the Philippines (AFP) ug molupyo sa Villa Verde, San Miguel, Tagum City niabot sa Tagum City Police Station aron nga ipapriso ang suspek nga si Isidro.

Base sa inisyal nga imbestigasyon sa Tagum City PNP, ang suspek naaktuhan ni Baya nga pugsanong giablihan ang lingkuranan o U-box sa iyang kolor orange/puti nga Honda Click nga motorsiklo nga niadtong higayona giparada kilid sa usa ka establisemento sa Tagum Public Market.

Apan nakamatikod ang suspek sa presensiya ni Baya, busa nikaratil kini og dagan, dala ang bag nga nakuha gikan sa U-box sa motorsiklo.

Apan giingon nga gigukod ni Baya ang suspek hangtud nga naapsan ug nadakpan.

Ang suspek anaa karon sa kustodiya sa Tagum City Police Station alang sa tukmang disposasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph