North Cotabato, labing taas nga kaso sa dengue sa region 12

NISAKA og 47 porsiyento ang kaso sa dengue karong tuiga sa Cotabato Province kon itandi sa 2023.

Kini maoy gipahibawo sa Department of Health Region 12, pinaagi sa kang Entomologist Royfrextopher Boholst.

Gikan Enero hangtud sa Agosto ning tuiga, niabot sa 15,934 ang kaso sa dengue sa rehiyon ug adunay 59 ang natala nga namatay, mas taas sa 48 ka kaso sa namatay sa dengue sa miaging tuig.

Sa kinatibuk-ang ihap sa mga kaso, 5,889 ang gikan sa probinsiya sa Cotabato nga adunay labing daghang kaso sa tibuok rehiyon.

Gipasabot ni Boholst nga sa pagkakaron, gilauman nila nga motaas pa ang ihap sa mga kaso tungod sa kanunay nga pag-ulan nga maoy usa sa mga panahon diin mangitlog ang mga lamok nga nagdala og sakit nga dengue.

Kahinumdoman nga una nang gimando ni Governor Emmylou "Lala" Taliño-Mendoza nga palig-unon pa ang kampanya batok sa dengue.

Gisugyot ni Boholts sa katawhan sa Rehiyon 12 nga sundon ang 4 o'clock habit og fogging operation aron makunhoran ang mga kaso sa dengue. (EEF)