SI Presidential Assistant for Eastern Mindanao Leo Tereso Magno misaad nga tabangan ang lungsod sa Caraga sa Davao Oriental nga nag-ung-ong pa sa pagkaguba nga dala sa Bagyong Kabayan sa miaging buwan.
Sa pakigtagbo kang Caraga Mayor Ronnie Osnan niadtong Biyernes, Enero 12, 2024, gipangutana ni Magno ang gikinahanglan nga rehabilitasyon sa lugar.
Gibutyag ni Osnan ang gidak-on sa kadaot sa Bagyong Kabayan ug ang gidaghanon sa mga residente nga naapektuhan sa kalamidad. Ang Caraga dunay kapin sa 39,000 ka molupyo.
Gipasalig ni Magno kang Osnan nga tabangan niya ang munisipyo sa Caraga sa pagbangon niini.
Kadaghanan sa mga residente sa Munisipyo sa Caraga naapektuhan tungod sa pagbaha ug pagdahili sa yuta. Daghang mga imprastraktura usab ang naguba.