P225,000 'shabu' sakmit; 3 nasikop

MOKABAT sa P225,828.00 nga kantidad sa gidudahang shabu ang nasakmit sa kapulisan gikan sa nasakote nga Top 2 Regional High Value nga indibiduwal, uban ang lain pang duha niya ka kauban, sa New Society Village, Barangay Ilang, Davao City 1:08 sa kaadlawon, Martes, Septyembre 3, 2024.

Mga suspek nailhan nga si alyas Abdila Jhunlangs, 52-anyos, minyo ug welder, kinsa giilang Top 2 RHV; alyas Melvin, 18-anyos, ulitawo ug tinun-an; ug alyas Carl, 21-anyos, ulitawo, construction worker nga pulos molupyo sa nahisgutang lugar.

Base sa imbestigasyon, nasayran nga naglusad og hiniusang buy-bust operation ang mga pulis gikan sa Regional Police Drug Enforcement Unit XI, pangulohan ni Police Lieutenant Richard Dionision, acting chief CDEU-Davao City Police Office, ubos sa superbisyon ni Police Lieutenant Colonel Rolando S. Lorenzo Jr. sa RPDEU 11, uban ang mga personahe sa Sta. Ana Police Station, ubos sa superbisyon ni Police Major Richeen M. Lagnayo, ACOP ug mga ginsakpan sa NISG-EM hinungdan sa pagkaaresto sa mga nahisgutan.

Nasakmit gikan sa posisyon sa mga nahisgutan mao ang usa ka heat-sealed transparent plastic sachet nga dunay sulod nga gituohang shabu; upat pa ka laing heat-sealed transparent plastic sachet nga dunay sulod nga gituohang shabu; usa ka P1,000 bill nga dunay serial no. NJ447815 uban ang lima ka budol nga P1,000 bill isip buy-bust money; usa ka yunit sa Redmi Android selpon, kolor pearl white; ug usa ka black coin pouch.

Mga nahisgutang mga ebidensiya gimarkahan ug giinbentaryo sa lugar nga gihimoan sa operasyon uban sa presensiya sa mga saksi subay sa gimbut-an sa balaod.

Mga suspek ug mga ebidensiya gikustodiya na sa kuwerpo sa kapulisan. (WGM)