ANG lokal nga gobyerno sa siyudad sa Mati mitagana og pundo nga igahin sa mga atleta nga makadaug og medalya sa Davao Regional Athletic Association (Davraa) 2024.
Huwebes, Abril 4, personal nga giduaw ni Mati City Mayor Michelle Nakpil Rabat ang mga atleta sa siyudad sa ilang mga billeting quarters diha sa Bolton Elementary School ug Magallanes Elementary School.
Luyo sa pakighimamat sa mayor sa mga delegado, gidad-an sab niya kini og mga ayudang bugas.
Sa pikas bahin, mitagana ang Mati City LGU og P300,000 isip premyo sa mga Matinians nga atleta nga makabitbit og medalya sa Davraa.
Samtang dugang P1 million nga kantidad gidugang ni Rabat nga ihatag sa DepEd-Davao Region nga magamit alang sa pagpahigayon sa Davraa.
Una nang mihatag og P7 million sa DepEd Mati ang Mati City LGU nga igahin alang sa mga delegado nga apil sa paugnat sa kusog. (RGV)