PABILIN ang Davao City Police Office (DCPO) nga pursigido ug nagkomitar alang sa way puas nga kombati batok sa illegal nga druga.
Ang kapulisan nagpadayon nga mihimo og mga lakang aron nga luwas ang katilingban batok sa druga ug mas sigurado sa palibot alang sa tanan.
Ubos sa direktiba ni Police Colonel Hansel M. Marantan, acting city director, Baliok Police Station pangulohan ni Police Major Harold S. Untalan, malampuson nga nisikop sa top 4 high value target sa City Level pinaagi sa buy-bust.
Ang suspek nadakpan uban ang dakong kantidad sa shabu nga kantidad og P836,400 subay sa standard drug price.
Ang pagkasakmit sa maong druga dakong kawala sa drug operations sa dakbayan ug nagpakita sa kaepektibo sa intelligence ug operational strategies sa PNP sa pagpakgang sa pagkuyanap sa makadaut nga substansiya.
Kasong may kalambigitan sa ilegal nga druga ang atubangon sa suspek nga si alyas Brad, 42-anyos, nga gikan sa Caloocan City, Metro Manila, apan kasamtangang naninuyo sa Sitio Culuza, Lizada, Toril, Davao City.
Nadakpan ang suspek sa hiniusang puwersa sa kapulisan pasado alas 10:00 sa gabii, Oktubre 23, 2024, sa Sitio Culusa, Lizada, Toril, Siyudad sa Davao pinangunahan sa mga personahe sa Baliok Police Station, uban sa koordinayon sa Philippine Drug Enforcement Agency (PDEA).
Nakumpiska gikan sa suspek atol sa buy-bust, ang usa ka sachet, duha ka dagkong "square shape heat sealed transparent plastic sachets", ug upat ka mga "medium size square shape heat sealed transparent plastic sachets", nga pulos may unod nga "white crystalline substance" nga gituohang shabu nga nikantidad tanan og P836,400.
Gawas sa maong mga ebidensiya, nabawi sab sa kapulisan gikan sa dinakpan ang usa ka P1,000 nga nagsilbing marked money, usa ka blue nga sling bag, usa ka driver's license, ug usa ka cellular phone.
Mga ebidensiya nga nasakmit gimarkahan, gihulagwayan ug giimbentaryo sa mismong lugar sa Sitio Culusa, Lizada, Toril, Davao City atubangan sa presensiya sa suspek ug mga saksi subay sa gimando sa balaod. (Wenz G. Mendoza/July Aubrey R. Ngo)