Pagpanalipod sa Mount Apo mas gipahugtan pa pag-ayo sa PAMB

Pagpanalipod sa Mount Apo mas gipahugtan pa pag-ayo sa PAMB
Hulagway pinaambit ni Jessie Enid Jr.

GIISIP nga pinakataas nga bukid sa Pilipinas ug usa sa pinakasikat nga nature-based tourism sites sa nasud ang Mt. Apo Natural Park (MANP).

Tungod niini, higpit ang pagtuman sa istriktong pamaagi sa pagreserba sa kinaiyahan aron nga kapanalipdan ang maong bukid nga gilangkuban sa Rehiyon 11 ug 12.

Aron maseguro nga maprotektahan gayud ang Mt. Apo, gidumala kini sa Protected Area Management Board (PAMB) nga usa ka multisectoral body ug gipangulohan sa Regional Director sa Department of Environment and Natural Resources (DENR).

Gipahigayon ang Special MANP Cotabato Sub-PAMB sa Cooperative Training Center sa Barangay Magsaysay, Kidapawan City, pinangulohan ni Atty. Felix S. Alicer nga maoy DENR Regional Executive Director ug Chairperson sa MANP Cotabato Sub-PAMB.

Sa maong tigum, natuki ang pipila ka mga butang:

1.) Pagpangayo ug clearance gikan sa PAMB alang sa pagtukod sa daghang mga imprastraktura apil ang (a) siyam (9) ka road concreting projects sa Kidapawan City sulod sa protected area; (b) DPWH Balabag Multi-Purpose Building, Kidapawan City; (c) pagtukod sa ikaduhang andana sa opisina sa MANP-PAMO, perimeter fence, ug sentro sa impormasyon niini; (d) El Legado Resort. Giaprobahan sa PAMB ang maong mga hangyo sa kondisyon nga walay malapas niining protected area.

2.) Hangyo nga adunay koreksiyon sa listahan sa mga tenured migrant sa Barangay Perez, Ilomavis ug Balabag nga pulos sakop sa siyudad sa Kidapawan.

Mitambong sa maong tigum sila si Sangguniang Kabataan Provincial Federation President Karen Mitchie de Guzman ug Jessie Enid, Jr. isip mga representante ni Cotabato Governor Emmylou “Lala” J. Taliño-Mendoza.

Isip kabahin sa pagdumala sa mga protected areas sa probinsiya, ang lokal nga panggamhanan sa Cotabato ubos sa pagpangulo ni Mendoza naghingusog sa husto nga pagkonserba sa kinaiyahan aron maseguro nga mabuhi kini alang sa umaabot nga mga henerasyon, ug malikayan ang posibleng mga katalagman tungod sa iresponsable o ilegal nga pagpanghilabot sa gideklara nga protected areas. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph