Pagpusil-patay sa lalaki, away sa druga?

GITUOHANG away sa gidiling druga ang gilantaw nga motibo sa pagpusil patay sa lalaki ala 1:05 sa kaadlawon, Biyernes, Septyembre 6, 2024, sa General Santos City.

Giila ang biktima nga si Mark Joseph Sanchez, 33-anyos, minyo ug nagpuyo sa Sto. Niño, Barangay Apopong, General Santos City.

Gibutyag ni General Santos City Police Office Director Colonel Nicomedes Olaivar Jr. nga naglingkod lang ang biktima daplin sa National Highway sa Purok Malipayon, Barangay Apopong sa maong siyudad.

Apan kalit lang mibutho ang duha ka wala mailhing tawo ug nagpusil kaniya gamit ang kalibre .45 nga pistola.

Abtik sab nga miikyas ang mga suspek paingon sa sentro nga bahin sa dakbayan sakay sa motorsiklo.

Patay gilayon si Sanchez human makaangkon og upat ka samad pinusilan sa lawas.

Narekober gikan sa patay nga lawas niini ang mga pakite sa shabu sa gikan sa bulsa sa iyang pantalon.

Imbestigasyon sa kapulisan sa maong hitabo nagpadayon samtang gisuwat ning balita. (EEF)