GIKANAYON sa National Commission on Indigenous Peoples-Davao Region (NCIP-Davao Region) nga ang patay sa 13 ka mga Indigenous People (IP) o lumad sa Marilog dunay managlahing mga kaagi ug dili lang bangi sa yuta.
Kini maoy gipahayag ni NCIP-Davao Region Provincial Officer Indaliseo Diano atol sa Kapehan sa Davao, buntag sa Lunes, Oktubre 16, sa SM Ecoland.
Dugang ni Diano nga base sa taho sa Philippine National Police (PNP) ang pagpamatay sa mga lumad wala lang naglimin sa bangi sa yuta ug ang NCIP nakigkoordinar na sab sa mga nagpakabanang ahensiya sama sa militar, komunidad sa mga lumad, ug sa Local Government Unit (LGU).
“Ang status gyud sa kaso karon kay naa na ang uban sa court ang uban naay outstanding warrant and uban naay mora'g dili makita,” matud ni Diano.
Naghimo ang NCIP og ebalwasyon sa mga dokumento sa panag-uban sa City Government of Davao kon diin mga ahensiya mohanyag og sertipikasyon o permit kung ang aplikante mahuman sa pagtuman sa Certificate of Precondition sa NCIP, pinaagi niini ilang makunhoran ang mga insidente sa lugar.
Gawas niini, gipalig-on na sab sa NCIP ang ilang libre ug "prior informed consent" aron nga mga tag-iya og patigayon mokuha sa maong kondisyon ug isumite ngadto sa dakbayan alang sa pagkuha sa ilang business permit.
Samtang gikanayon ni Indigenous People Mandatory Representative (IPMR) Rodolfo M. Mande sa paghinabi kaniya kagahapon sa buntag, nga ang PNP, National Bureau of Investigation (NBI), ug militar nagseguro sa kaluwasan sa komunidad sa lumad.
Niadtong Septyembre 12, 2023, giawhag ni Mande ang Department of Justice, NBI, ug PNP nga dalion ang imbestigasyon sa wala pa masulbad nga mga kasong pagpatay nga naglambigit sa mga lumad sa Davao City. (RGP)