'Pahalipay sa Taal' gihugopan

'Pahalipay sa Taal' gihugopan
(Hulagway iya sa Philippine News Agency)

MOABOT sa 40,000 indibiduwal ang nidagsa sa tinuig nga “Pahalipay sa Taal” niadtong Disyembre 25, 2023.

Gikanayon ni Police Captain Hazel Tuazon, tigpamaba sa Davao City Police Office (DCPO) sa dihang nahinabi sa radyo niadtong Martes sa buntag, Disyembre 26, 2023, nga way gitaho nga insidente atol sa pagpanghatag og food packs apan dunay mga kaso sa mga tawo nga nakuyapan apan dunay mga ambulansiya sa lugar nga daling nakaresponde.

“Sa atoang estimated crowd kagahapon 40,000, sa paglinya hangtud sa nahuman ang pagpanghatag sa pahalipay,” butyag niya.

Matud ni Tuazon nga mga 12:15 sa hapon gihimo na ang ilang "cut-off" ug pagka-1:15 sa hapon, ang pagpanghatag og gasa natapos.

Gikanayon niini nga bisan sa wala pa ang pagpanghatag, nagpakatap na ang DCPO og daghang mga pulis sa lugar. Niabot og mga 3,356 security personnel apil na mga force multipliers gikan sa Police Station 3, Bureau of Fire Protection (BFP), Special Weapons And Tactics (Swat), Explosive Ordnance Disposal (EOD), ug police auxiliary, ang paposte sa maong aktibidad.

Si Department of Education Secretary ug Vice President Sara Duterte nitambong sa "gift-giving" nga aktibidad kon diin nakighugoy-hugoy siya sa mga Dabawenyos kinsa maoy nagdawat sa mga food packs, gift checks, cash, ug lunch packs.

Samtang si kanhi presidente Rodrigo Duterte ug Davao City Mayor Sebastian Duterte nakigtagbo uban sa mga opisyales sa barangay aron sa pagpasalamat kanila tungod sa ilang suporta sa aktibidad.

Samtang si Jherom Manayan, staff sa City Social Welfare and Development Office (CSWDO), nagsulti sa SunStar Davao sa paghinabi nga sila ang mga nag-abag sa mga ginikanan nga dunay mga anak. Sila ang nagbantay sa mga bata aron ang ilang mga ginikanan di maglisud sa pagkuha sa ilang food packs.

Si Khate Adessa Gavanez, usa sa mga nakadawat sa food packs, nagsulti sa SunStar sa paghinabi sa Messenger nga kini na ang iyang ikaupat nga higayon nga nakadawat og food pack gikan sa Duterte. Matud niya nga sukad nga siya 16 anyos pa, naglinya na siya alang sa pahalipay ug karon nga siya 21-anyos na kabahin siya sa mga tawo nga naghandom alang sa pahalipay matag tuig.

“Dakong salamat kaayu sa Duterte Family kay naa namiy pambugas ug ikunsumo. Labi na sa gift check na dako sad tabang sa amoa– Hago man pero worth it ug makalingaw man sad samot naa kay kauban,” padayag ni Gavanez.

Human makadawat sa ilang pahalipay, pipila sa mga Dabawenyos nilinya sab sa mga malls kon diin ilang gigamit ang ilang mga gift certificates.

Daghang mga Dabawenyo nakadawat og gift packs, apan dunay uban nga nadismaya kay wala sila makaabot sa "cut-off time" sa maong pahalipay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph