GIBALIKAN sa babaye uban sa iyang uyab ang ilang nabilin nga mga gamit sa usa ka lodging inn sa Poblacion District sa Davao City Miyerkules sa hapon, Valentine’s Day, Pebrero 14, 2024 kay kini ilang nalimtan sa ilang pag-check out sa samang adlaw.
Apan sa ilang pagbalik wala na kuno ang usa sa ilang mga gamit, diin ang nahibilin ang panty nalang, usa ka t-shirt ug ang charger sa Andriod phone, hinungdan nga usa ka Anamarie (bansagon gitago) 23-anyos, taga Kidapawan City ang midangop sa kapulisan sa San Pedro Police Station.
Saysay ni Anamarie sa duty desk officer sa San Pedro PNP sa iyang pagpa-blotter niini, nga dili nalang unta siya magpatala sa hitabo, apan napugos siya dihang na-insulto kuno siya sa front desk sa lodging inn.
Sumala pa nga milimod ang front desk nga walay relo nga nabilin, human sa naunang alegasyon sa reklamante nga nabilin ang relo niini uban sa mga gamit nga ilang nahipos.
Didto na mikaransa ang reklamante dihang giingnan kini sa front desk sa lodging inn nga naglama kuno ang panty niini nga nabilin, hinungdan nga gikasagmuyo kini ni Anamarie.
Wala pa usab nasubay ang kuha sa CCTV apan gina-imbestigahan na sa lodging inn ang ilang room boy kinsa maoy nanglimpyo niadtong mga orasa.
Nasayran nga sayo nga nanggawas sila Anamarie uban ang boyfriend niini kay mobalhin kuno sila og lahi nga lodging inn aron magsaulog sa Valentine’s Day.
Ang maong kaso anaa na sa General Investigation Section sa San Pedro PNP.