Patay gilabay sa kalsada nailhan na

Patay gilabay sa kalsada nailhan na
(Hulagway iya sa DCPO)

NAILHAN na ang lalaki nga napalgang wala nay kinabuhi daplin sa kalsada sa Bypass Road, Barangay Catalunan Pequeño, Davao City, alas 8:20 Lunes sa buntag, Hulyo 8, 2024.

Giila sa Davao City Police Office (DCPO) nga ang biktima mao si Rico Mahinay, 32-anyos, helper, ug residente sa Poblacion, Sawata, Davao del Norte.

Adunay mga nakitang samad-dinunggaban sa lawas sa biktima, diin ang kapulisan wala pay matumbok nga motibo ug suspek sa krimen sanglit nagpadayon pa ang ilang makuting imbestigasyon.

Gibutyag sa agalon sa biktima nga gabii niadtong Hulyo 7, 2024, nag-inom ang biktima ug ang iyang mga kauban sa tindahan.

Dugang nasayran nga ang biktima naglalis sa dihang nag-inom ug human sa kasadya, mibiya kini gamit ang bisikleta nga ubos sa impluwensiya sa alcohol.

Nasayran nga mobisita unta ang biktima sa iyang higala sa Bago Gallera, Davao City, apan pagkaugma, dihang wala na motunga ang biktima sa trabaho, nanawag ang agalon sa cellphone niini.

Usa ka babaye ang nitubag ug niingon nga iyang nakit-an ang mga butang sa biktima sa Bypass Road sa Barangay Catalunan Pequeno. Nagpaila siya nga street sweeper sa Bypass Road ug nasayran na lang nila pinaagi sa post sa Facebook nga dunay patay nga napalgan sa maong lugar, ug mao ang ilang helper.

Nakahibalo na ang mga kabanay sa biktima diin ang kapulisan sa Baliok Police Station padayong misubay sa hitabo aron maila ug masikop ang mga responsable sa krimen. (JPC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph