NAGMINGHOY karon sud sa selda sa Maa Police Station ang usa ka babaye nga ginganlan og alyas Madam kinsa nadakpan atol sa gilusad nga buy-bust operation sa awtoridad alas 6:30 sa gabii, Enero 29, 2024.
Sumala sa Maa PNP nga ang dinakpan nga si alyas Madam, 29-anyos, utility worker, nagpuyo sa Purok 1 Mabini St. Brgy. 37-D Boulevard, Davao City, kinsa usa ka Top 4 sa listahan sa mga high value individual (HVI) sa City level sa Davao City Police Office (DCPO).
Ang suspetsado nadakpan didto sa Purok 17, Datu Loho St., Brgy. Maa, Davao City diin dala niini ang gituohang shabu bugti sa buy-bust money nga dala sa nagtakuban nga pulis.
Atol sa operasyon ang suspek nakuhaan og gituohang shabu nga motimbang og 90.01 gramos nga dunay gibana-bana nga street value P612,068, ug nakuhaan sab kini og cellphone nga maoy gigamit sa transaksyon, buy-bust money ug pipila ka mga drug paraphernalia.
Sumala sa DCPO nga posibleng gikan ang suplay sa shabu sa Boulevard area, butang nga mas miigmat karon ang intel monitoring sa Sta. Ana Police Station.
Kasong pagsupak sa Section 5 ug Section 11 sa Republic Act (R.A.) 9165 kon Comprehensive Dangerous Drug Act of 2002 ang atubangon nga kaso sa dinakpan didto sa korte.