GIBALHOG karon sa selda sa Sta. Ana Police Station ang usa ka sekyu human nga nakuhaan og pusil sa bag nga walay lisensya atol sa checkpoint nga gipahigayon alas 10:33 sa gabii niadtong Sabado, Abril 20, 2024 sa Dacudao Avenue, Barangay Paciano Bangoy, Agdao District, Davao City.
Gisita ang sekyu nga si alyas Jandel, 22-anyos nga taga Sales Street, Barangay 28-C, Poblacion ni Sta. Ana PNP deputy station commander Police Captain Rizalto Clapiz III kay naka-tsinelas lang kini nga nagmaneho sa motorsiklo.
Dihang pagpangayo og lisensya, pag-abli sa bag sa suspek adunay nakita nga armas hinungdan nga gipangayoan kini og lisensya.
Sumala ni Clapiz nga walay napakita nga lisensya si Jandel hinungdan nga temporaryo kini nilang gikustodiya.
Usa ka Armscor .38 Caliber revolver adunay serial no. 1238540 nga adunay lima ka mga buhing bala ang narekober sa posisyon sa dinakpan. (JPC)