Shabu nga P1.7M nabulilyaso

Shabu nga P1.7M nabulilyaso
Hulagway gikan sa PDEA-BAR

COTABATO CITY -- Kaso nga kalapasan sa Republic Act 9165, o Comprehensive Dangerous Drug Act of 2002, ang ipasaka nga asunto batok sa duha ka mga tawo nga nadakpan sa dihang nisulay og payuhot og dakong kantidad sa shabu alas 5:00 sa hapon, Lunes, Marso 11, 2024, sa Datu Odin Sinsuat, probinsiya sa Maguindanao del Norte.

Sila Nunga Abtila alyas Longhair ug Amir Usman alyas Amier, pulos molupyo sa Datu Odin Sinsuat sa nahisgutang probinsiya, pulos gipangposasan human gitunol ang shabu ngadto sa asset sa Philippine Drugs Enforcement Agency sa Bangsamoro Autonomous Region (PDEA-BAR) atol sa gihimong drug buy-bust operation.

Gikanayon ni Maguindanao del Norte Police Provincial Office Director Colonel Sultan Salman Sapal nga ang buy-bust operation gilusad sa PDEA-BAR, inabagan sa uban pang puwersa sa kapulisan sa Datu Odin Sinsuat Municipal Police Station didto sa Barangay Makir sa nahisgutang lungsod.

Nasakmit gikan sa posisyon sa mga suspek ang 5 ka medium size nga pakite sa shabu nga nitimbang og 250 gramos nga nikantidad og P1.7 milyon base sa drug market value niini.

Narekober sab ang buy-bust money, cellphone, 1 XRM Honda motorcycle ug panyo sa mga awtoridad.

Tingkagol na sa prisohan sa Datu Odin Sinsuat MPS ang mga suspek samtang nagpaabot kanus-a sila taralon ngadto sa hukmanan. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph