Shear Line mihugno sa tulay; daghang imprastraktura gidaut

Shear Line mihugno sa tulay; daghang imprastraktura gidaut
Hulagway iya ni Crizzelle Benitez.

DAVAO REGION -- Pipila lang ka semana gikan sa grabeng epekto nga dala sa Tropical Depression Kabayan (TD Kabayan) (International name, Jelawat) nga grabeng nakaapekto sa kadaghanang bahin sa silangang baybayon sa Davao Oriental, laing taas nga tulay sa lungsod sa Caraga sa nasangpit nga probinsya ang nahugno tungod sa sa padayon nga kusog nga pag-ulan hatud sa Shear Line/Localized Thunderstorms.

Ang Catigod-San Pedro Bridge nagdugtong sa Catigod ug mga silingang sitio sa Pacahon, Tubod, Boa ug uban pang dagkong barangay sa munisipyo.

Kini ang ikatulo nga nag-unang taytayan nga naguba nunot sa steel ug hanging bridge sa Lamiawan nga nagdugtong sa mga komunidad sa Mandaya sa Barangay Pichon ilabi na sa sentral nga sitio niini, samtang sa Sangab ang usa mao ang taytayan sa Barangay Palma Gil niadtong Disyembre 18, 2023 nga ang tanan niini under construction pa.

Sa karon nga gi-post nga video sa Facebook account ni Indira Zyra Calig-onan, usa ka public elementary teacher sa Potenciano A. Mabanding Integrated School (PAMIS) nga nahimutang sa Catigod, iyang gipaambit ang pipila ka klaro nga mga hulagway nga gibilin sa maong kalamidad.

“Our kind of January” subay sa iyang kapsyon sa mga hulagway.

Sa laing bahin, si Sherwin Matucol, ni-post usab og aerial view sa tibuok dapit nga mipaambit sa iyang simpatiya isip usa sa mga apektadong residente.

“Isip usa ka Caragueño, ako naghinaot nga magpadayon kamo nga lig-on ug kanunayong malaumon luyo niining mapakasubo nga kasinatian,” ingon pa niya.

Sa laing bahin, ang Barangay Pichon nga kanhi nahilain, nakatala og daghang pagdahili sa yuta sa upat ka sitio niini nga mao ang Lanangan, Poblacion, Panlaisan, ug Tubilan.

Sa inisyal nga report sa 701st Brigade, Philippine Army (PA), dili mominos 64 ka pamilya ang kasamtangang namakwit sa mga evacuation centers.

Sa pagsulat sa balita, ang local government unit (LGU) sa Caraga kauban ang Municipal Disaster Risk Reduction Management Office (MDRRMO), ug tanang ahensya sa gobyerno nga konektado sa Crisis Management Committee padayon pa nga nagpahigayon og impact assessment aron matino ang kinatibuk-ang kantidad sa kadaot sa agrikultura ug imprastraktura nga gibilin sa kusog nga ulan.

Samtang, suspendido gihapon ang klase sa tanang pampubliko ug pribadong institusyon sa nasampit nga dapit hangtod Enero 20, ning tuiga.

Gi-update na karon sa Office of the Civil Defense-Davao Region (OCD-Davao Region) ang ilang tally; kapin sa 1,000 ka residente sa Davao Region ang apektado - 108 niini gikan sa Davao Oriental lamang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph