Sundalo gilubngan og 7 bala

BUGHA ang sundalo human pusila sa giingong riding in tandem alas 6:20 sa gabii, Miyerkules, Agosto 28, 2024, sa Cotabato City.

Giila ang biktima nga si Private First Class Seigfried Racky Flor Alivia, 36-anyos, minyo, ug nagpuyo sa Pansacala Street, Barangay Rosary Heights 10, Cotabato City.

Gibutyag ni Cotabato City Police Office Director Colonel Joel Estaris nga sakay ang biktima sa iyang motorsiklo gikan sa trabaho niini ug pauli na sa iyang balay.

Apan pag-abot niya sa Peñafrancia, Barangay Rosary Heights 11, kalit lang mibutho ang duha ka wala mailhing tawo ug gipusil kini gamit ang kalibre .45 nga pistola.

Abtik sab nga miikyas ang mga suspek sakay sa motorsiklo nga walay plaka paingon sa sentro nga bahin sa dakabayan.

Patay gilayon si Alivia nga nakaangkon og pito ka samad pinusilan sa nagkadaiyang parte sa lawas.

Sa wala pa ang pagpamusil, giingong ang biktima dunay nakaaway sa ilang dapit gumikan sa personal nga bangi.

Hinuon, kapulisan sa Cotabato City Police Office naglusad pa og lawom nga imbestigasyon aron nga matumbok ang tinuod nga motibo sa pagpatay sa sundalo ug ang mga bansagon sa mga suspek. (EEF)