Suspek sa 4 ihap kasong sulay'g patay, sikop

BALHOG na sa prisohan ang usa ka wanted person tungod sa upat ka kasong attempted murder human madakpi alas 3:00 sa kaadlawon, Martes, Agosto 27, 2024, sa Maguindanao del Sur.

Giila ang suspek nga si Kamarudin Talib, alyas Kamarudin Gambal Talib, 55-anyos, minyo ug nagpuyo sa Brgy. Midpandacan, General Salipada K. Pendatun, Maguindanao del Sur.

Gibutyag ni Maguindanao del Sur Police Provincial Office Director Colonel Roel Sermese nga gironda sa mga sakop sa Criminal Investigation and Detection Group-Bangsamoro Autonomous Region (CIDG-BAR) ang gipuy-an sa suspek.

Wala na maka-ikyas ang suspek sa dihang napalibutan na siya sa mga pulis.

Si Talib maoy number 9 most wanted person sa Police Regional Office sa Region 12.

Nag-atubang siya og upat ka ihap sa kasong attempted murder nga giisyu sa korte niadtong 2022 ug adunay piyansa nga P120,000 matag kaso.

Giabagan sa pagronda sa CIDG-BAR sa pagpatuman sa warrant of arrest mao ang kapulisan sa Maguindanao ug militar. (EEF)