INAY nga motahan sa kapulisan ang usa ka suspek nga gireklamo nga nanglugos, misukol hinuon kini hinungdan nga napatay sa mga sakop sa Los Amigos Police Station, alas 12 sa udto, niadtong Lunes, Nobyembre 20, 2023 sa Purok 6A, Baranagy Los Amigos, Tugbok District, Davao City.
Ang spokesperson sa Davao City Police Office nga si Police Captain Hazel Tuazon, niila sa suspek nga si Ronaldo Tan, 43-anyos taga Barangay Manuel Guianga, Tugbok District.
Gibutyag ni Tuazon nga nakadawat og report ang Los Amigos Police Station subay sa sumbong sa usa ka barangay official sa dapit.
Giingon nga midangop sa presinto ang nahisgutan ug nagpakitabang human nga dunay nadawat siyang sumbong pinaagi sa text labot sa usa ka armadong lalaki ang anaa sa maong dapit, hinungdan nga miresponde ang mga pulis sakay sa mobile patrol ug sa mga motor.
Pag-abot sa maong lugar, nakita nila ang suspek nga naggunit og .38 caliber revolver. Nagpaila ang mga pulis sa dihang kalit silang gipamusil niini, apan nakalikay sila.
Mibalos ang mga pulis ug naigo ang suspek kinsa daling gidala sa Isaac T. Robillo Hospital sa Calinan apan gideklara kining dead on arrival sa attending physician.
"Ang suspek adunay pending criminal case sa Davao City Prosecutors Office sa kasong RA 8353 (Rape) 3 counts ug RA 11648 (Statutory Rape) Two Counts," sumala ni Police Captain Tuazon.
