PABILING blangko pa ang kapulisan sa Baliok Police Station sa pagpusil-patay sa lalaki pasado alas 12 kagahapon sa udto, Huwebes, Oktubre 17, 2024, atubangan sa Bago Elementary School, Bago Gallera Road, Talomo District, Davao City.
Subay sa blotter sa Davao City Police Office (DCPO) ang biktima nga si alyas Marlon, 34-45-anyos ang pangedaron, nag-parking lamang sa iyang motorsiklo sa dapit dihang duha ka mga lalaki sakay sa scooter motorcycle, diin ang usa kanila miduol ug gipusil ang biktima sa makadaghang higayon.
Natumba dayon ang biktima kinsa nakahiagom og daghang samad-pinusilan sa kalawasan nga maoy hinungdan sa hinanaling kamatayon niini samtang ang mga mamumuno paspas nga misibat sakay sa motorsiklo.
Sumala sa DCPO nga mihimo na sila og lawom nga imbestigasyon sa krimen ug ginasubay ang kuha sa closed-circuit television (CCTV) camera nga anaa namuntar sa dapit asa nahitabo ang pagpamusil.
“Mihimo ang ang PS-17 og lawom nga imbestigasyon sa krimen aron masubay nato ang mga suspek ug masikop,” ingon ni DCPO spokesperson Capt. Hazel Tuazon nga nahinabi sa SuperBalita Davao, kagahapon.
Sa pagsuwat ning balita, wala pa nailhan ang tinuod nga pangalan sa biktima. (Jeepy P. Compio)