GILAMAYAN na ang barangay tanod sa Rivera Funeral Parlor sa Mambago-A, Samal District, Island Garden City of Samal human mamatay sa pagkabangga sa gisakyan niini nga motorsiklo sa punoan sa lubi sa Sitio Tucanga, Barangay Libertad, Kaputian District sa maong siyudad alas 6:55 sa gabii, Biyernes, Marso 1, 2024.
Gibutyag nga ang insidente naglambigit sa kolor pula nga Honda Bravo nga motorsiklo nga dunay plaka nga 8043LT ug gimaneho ni Felix Repollo Batino, 59, minyo, tanod kon diin angkas niini ang usa ka 9-anyos.
Base sa inisyal nga imbestigasyon, naglabigar ang nahisgutang motorsiklo sa dalan gikan sa Barangay Libertad, Kaputian District, padung sa ilang panimalay.
Apan pag-abot sa dapit diin nahitabo ang insidente partikular sa kurbadang bahin sa dalan, kalit lang nag-overshoot ang motorsiklo gumikan sa danlog nga dalan tungod sa ulan diritso sa punoan sa lubi.
Giingon nga ang drayber ubos sa impluwensiya sa ilimnong makahubog ug nawad-a’g kontrol sa gimanehong motorsiklo nga miresulta sa pagkabangga kon diin apil ang bata nahagbong sa yuta.
Giingon nga ang drayber nakahiagom og seryusong samad sa lawas samtang ang 9-anyos og gamay nga angol kon diin pulos gidala ngadto sa Samal District Hospital-Samal Zone pinaagi sa mga miresponding sakop sa City Disaster Risk Reduction and Management Center sa Igacos apan ang drayber gideklarang dead on arrival sa doktor.