KIDAPAWAN CITY - Atraso ang gilantaw sa awtoridad nga motibo sa pagpatay sa usa ka trabahante nga nakaplagang wala nay kinabuhi alas 8 sa buntag, Miyerkules, Disyembe 20, 2023 didto sa probinsiya sa Cotabato.
Giila ang biktima nga si Roselito Pagayon, 32-anyos, minyo ug nagpuyo sa Barangay Poblacion, Tulunan, North Cotabato.
Gibutyag ni M’lang Chief of Police, Lieutenant Colonel Realan Mamon nga mismong mga nag-jogging ang nagtaho sa ilaha nga dunay patay nga lawas sa tawo nga naglutaw sa Bialong River sa utlanan nga bahin sa Brgy. Inas ug Brgy. Bialong M’lang ubos sa tulay.
Abtik nga nagresponde ang mga pulis ug Scene of the Crime Operatives (Soco) team nga nag-imbestiga sa kamatayon sa biktima.
Sa taas sa tulay dunay nagpasad nga dugo ug nahibilin pa ang tsinelas sa biktima nga nagtrabaho sa plantasyon sa saging.
Dunay mga bun-og ug samad sa lawas nga agig dinunggaban ug gihulog sa tulay.
Daghan ang nagtuo nga biktima sa salvage ang maong nahisgutan.
Sa kasamtangan ang kapulisan sa M’lang Municipal Police Station ang padayon nga nag-imbestiga sa pagpatay sa biktima.