HUMAN ang malampuson nga pagbukas sa Davraa Meet 2024, Abril 1 sa hapon, nagpanikad na ang tanang atleta sa tagsatagsa nila ka duwa.
Kagahapon, Abril 2, nakuha sa atleta gikan Davao City ang unang gold medal sa kompetisyon.
Mihunay og dagan sa secondary girls 3,000-meter run si Mary Jane Pagayon aron makuha ang bulawan nga medalya sa lumba nga gihimo sa University of Mindanao (UM) track oval.
Si Pagayon, 16, etudyante sa Emar Human and Enviromental College mapasalamaton sa kadaugan.
Suma niya nga nagbunga ang tanan niyang paningkamot sa training, pagsagubang sa ulan ug init ug nakuha ang gipangandoy nga medalya.
Samtang ang atleta gikan Davao Oriental nga sila Jessica Leah Losentes ug Khea Jean Cenia miangkon sa gold ug silver sa elementary girls javelin throw sa unang adlaw sa athletics competition diha gihapon sa UM Matina track oval.
Ang taga Davao del Sur nga si Daniela Baquiran sab ang miangkon sa bronze.
Miapas sab sa una nilang gold si Jessica Leah Losentes sa Davao Oriental Sunrisers sa elementary girls javelin throw event.Tampo nga hulagway
Hugyaw nga opening
Si Vice President and Education Secretary Sara Duterte maoy nangunang bisita sa opening sa Davraa 2024, Lunes sa hapon sa DC-UP Sports Complex, UP Mindanao.
Una pa man mihatag sa iyang mensahe gilamano una sa opisyal ug gihimamat ang mga atletang apil sa kompetisyon nga matapos Abril 7 ning tuig.
Usa sa pahinumdum sa opisyal ngadto sa mga coaches nga mamahimo nilang undangon ang ilang duwa kung tumang kainit na ang temperatura.
Nagpahinumdum sab si Duterte sa mga atleta nga di maikog nga magpa-sub og moduwa na sunod higayon tungod matag tuig man ang kompetisyon.
'Zero incidents' gipasalig
Ang Davao City Public Safety and Security Office (PSSO) mipasalig sab og "zero incidents" sa tibuok pagpahigayon sa kompetisyon.
Si PSSO Head Angel Sumagaysay nagkanayon nga anaa sa 14,966 security personnel nagmonitor sa 17 billeting quarters ug tournament venues, ug sa kapin 7,000 ka student-athletes gikan sa 11 ka divisions sa Davao Region.
Ang security forces gilangkuban sa Davao City Police Office, Task Force Davao, Davao City Civil Security Unit, police auxiliaries, traffic enforcers gikan sa Davao City Transport and Traffic Management Office, ug Traffic Enforcement Unit.
Luyo sa security forces duna say mga medical personnels nga gideploy. (RGV/CIO)