USA ka dakong kadaugan alang sa tanang delivery riders sa dakbayan sa Dabaw ang pagwagtang sa dugay na namong giantos nga requirement nga business permit sulod sa tulo ka tuig. Kini usa ka pamatuod nga kung maghiusa kita, walay dili makab-ot nga kausaban.
Ang panaghiusa ug pagka-kusganon sa tingog sa mga riders maoy nag-una nga pwersa nga nagpagwagtang sa business permit nga rekisito.
Among ipadayag ang among pasalamat sa City Council sa ilang pagsabot ug pagresponde sa dugay nang mulo namong mga delivery rider. Dako sab among pasalamat sa walay puas nga pagsuporta ug giya nga gihatag ni kanhing Konsehal Pamela "Pameng" Librado, bisan wala man siya sa konseho sa milabay'ng tulo ka tuig, wala siya mihunong sa iyang pagbarog alang sa katungod namong mga rider. Ang iyang walay paglubad nga suporta ug paningkamot dili gyud namo malimtan.
Nagpasalamat usab kami sa publiko nga nisabot ug nisimpatiya kanamo, ug sa mga media nga nitabang og padayag sa among mga mulo.
Bisan pa man sa among nakab-ot, wala pa mahuman ang among mga problema tali sa among trabaho. Dili lang kutob dinhi ang among pakigbisog, magpadayon kami sa pagbarog alang sa interes sa tanang delivery riders sa dakbayan sa Dabaw.
