5 tribu magtigi karon

ANG 2nd Davao Indigenous Tribal Games tigian sa lima ka tribu sa pagpanguna sa defending champion nga Ata Manobo nga magpakita sa ilang kultura ug tradisyon didto sa People's Park karong adlawa.

Gipasiugdahan sa lokal nga kagamhanan sa Dabaw pinaagi sa Sports Development Division-City Mayor's Office (SDD-CMO), ang usa ka adlaw nga aktibidad nga mohatag og dungog sa mga indigenous people's (IPs) sa siyudad ug usa sa highlights sa pagselebrar sa 30th Kadayawan Festival.

Gawas sa mga duwa, dunay ritual chanting, dances ug kultural presentasyon gikan sa nagkadaiyang tribu ang masaksihan karon sa Tribal Games nga sugdan alas 8 sa buntag hangtud alas 5 sa hapon.

Si Department of Tourism (DOT) Assistant Secretary Arturo Boncato Jr. giimbita isip guest speaker samtang si City Administrator Atty. Jesus Melchor V. Quitain ang mohatag og "welcome message."

Si Councilor Halila Y. Sudagar, IP representative to the City Council, mohatag sa premyong kuwarta ug medalya sa mga modaug sa hapon samtang si SDD-CMO officer-in-charge William "Butch" Ramirez maoy pormal modeklara sa torneyo.

Magpakita sa ilang abilidad sa 12 ka events ang Matigsalog, Obu Manovu, Tagabawa ug Klata Manobo diin moabot sa 250 lumads ang magtakus.

Paghimo og kalayo, water fetching, tug-of-war ug hitting targets gamit ang ilang pana.

Ang laing dulaon mao ang osoroy, papano, sisibow, solopot, bubuntug, aakow, tataringki, sosakoro, kakasing, sisikot, palahoy ug bibinayu.

Moabo sa P580,000 budget ang gigahin alang karon lakip na ang premyong kuwarta ug pagkaon sa mga moduwang lumad.

Ang kampeyon mouli og P55,000 samtang ang ikaduha ug ikatulong puwesto makadawat og P45,000 ug P35,000, sa maong han-ay.

Ang ikaupat ug ikalimang puwesto parehong makakuha og P20,000 matag usa. (SDD-CMO)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph