Editoryal: 'Shame campaign'

DUNAY sugyot karon ang usa ka magbabalaod nga iagi sa "shame campaign" ang mga kongresista nga absenot aron nga magkugi og tambong sa sesyon.

Kini human nga kapin tulo ka semana nga way nahimong quorum ang Kamara hinungdan nga wa makaaginod ang mga mahinungdanon nga balaudnon nga angay untang hisgutan, apil na ang Basic Law for the Bangsamoro Autonomous Region.

Alang kang Dasmarinas City Representative Elpidio Barzaga pabor siya nga ipublikar ang pangalan sa mga kongresista nga tapolan nga motambong sa plenaryo.

Subay sa sugyot ni Barzaga nga matag adlaw ipublikar sa media ang pangalan sa mga kongresista nga wala sa sesyon aron nga masayran sa publiko kon unsa ang ilang attendance record isip mga representante sa ilang mga distrito.

Duna man goy uban nga nahimo na lang palusot ang ilang trabaho sa distrito sa panahon nga mopalta sa pagtambong sa sesyon bisan og Lunes hangtud Miyerkules lang kini himuon.

Gihatagan man unta sila og panahon nga atimanon ang ilang mga trabaho sa ilang mga distrito sa adlaw nga Huwebes ug Biyernes.

Apan mangita pa gihapon og palusot aron nga di makatambong sa sesyon.

Prayoridad unta sa atong mga kongresista ang pagpanday ug pagpalig-on og mga balaod nga nagtumong alang sa kaayohan sa katawhan kay mao man kini ang una nilang buluhaton kon nganong giboto sa katawhan.

Haum kaayo kini nga sugyot ning panahona kay nagkaduol na ang eleksiyon. Segurado nga daghan ang mga magbabalaod magkugi og pangampanya, ilabi na gayud kadtong modagan, busa kanunay na silang mopalta sa mga sesyon.

Maayo pod unta kon himuon sab kini dinhi mismo sa Konseho sa siyudad sa Dabaw aron nga mahibaw-an sa mga Dabawenyo kon kinsa kadtong mga konsehal nga seryuso sa ilang trabaho ug kadtong mga tapulan aron sa sunod nga eleksiyon di na botohan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph