NBI, DCPO nagbuligay pagsulbad sa kamatayon sa ex-MMA champion

ANG National Bureau of Investigation (NBI) sa Davao Region ug Davao City Police Office (DCPO) nagtinabangay sa pagsulbad sa kasong pagpatay sa kanhi Pacific Xtreme Combat (PXC) champion nga gipusil sa Dakbayan sa Davao niadtong Dominggo sa buntag.

Si Atty. Dante Gierran, regional director sa NBI-Davao, nagsulti nga nagkigkoordinar na sila sa DCPO pinaagi sa Talomo Police Station nga gipanguluhan ni Chief Inspector Alfredo Santillana alang sa ilang imbestigasyon.

Kini ang pahayag sa opisyal labot sa kamatayon ni Ale Brashary dela Cruz Cali, 25, professional Mixed Martial Arts (MMA) fighter sa Pacific Extreme Combat (PXC), ug residente sa Barangay 76-A Bucana, ning dakbayan.

Si Cali gipusil patay didto sa Crossing Ulas, Barangay Talomo Proper, alas 10 sa buntag niadtong Dominggo.

Si Gierran nagkanayon nga di na kinahanglan nga magmugna og Special Task Group tali DCPO ug NBI-Davao alang sa maong kaso, apan ila karong gipalawman ang imbestigasyon.

Si Police Chief Inspector Milgrace Driz, spokesperson sa DCPO, nagbutyag usab nga gilusad nila karon ang pagsusi sa profile sa mamumuno ug biktima.

Gikomprima usab ni Gierran nga si Cali midangop sa ilang buhatan niadtong miaging semana aron itaho ang hulga sa kinabuhi nga iyang nadawat.

"Hindi talaga namin nalaman kung saan related yung mga death threats na natanggap niya. It can be work-related or personal grudge," sulti ni Gierran.

Si Cali, kinsa gitawag sa angga nga The Young Gun, nagtrabaho isip gym instructor sa Metro Lifestyle Gym nahimutang sa kanto Jacinto Extension ug Torres Street.

Ang biktima gidudahan nga dunay relasyon sa usa ka babaye nga minyo sa opisyal sa militar, apan giingon ni Gierran nga wala pay igong basehan ang maong pasangil.

"We cannot judge any person with these kind of allegations without evidences," sulti ni Gierran. (KRP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph