Tambagi Ko Noy Tikyo: Di kapasaylo

DEAR Noy Tikyo,

Ako diay si Mary, taga probinsiya apan kasamtangan nga nia sa siyudad nagtrabaho. Nag-edad na og 26-anyos nga nagpakabuhi nga way inahan ug amahan kay nagkabuwag man sila sa dihang gamay pa ko.

Ang akong apohan nga lalaki nga amahan sa akong Papa ang nagpadako nako.

Human sila magbuwag, ang akong inahan milangyaw sa Luzon aron nga mangita og trabaho hangtud nga naminyo siya og laing lalaki.

Di kaayo ko makabasol sa akong Mama kay si Papa man god ang nakasala kay maoy unang nangaliwa.

Apan sa wa nako damha, mibalik ang akong amahan ug nangayo og pasaylo kanamo sa akong apohan.

Napasaylo na ni lolo si Papa apan ako wala pa. Grabe ang akong kasuko niya tungod kay di unta ko maingon niini karon kon wa siya magbinuang ni Mama.

Gitambagan ko sa akong lolo nga pasayluon na lang ang akong amahan, apil na ang uban nakong paryente, apan maglisud pa ko, Noy. Palihug tambagi ko.

Mary

r*******

Mary,

Di ko ikaw mabasol kon ingon niini kadako ang imong kasuko ngadto sa imong amahan. Kay gumikan sa iyang gibuhat, nabungkag ang inyong pamilya ug naguba ang imong mga pangandoy.

Kon wa unta kadto nahitabo, seguro nindot ang inyong pagpuyo karon ug maayo sab ang imong kahimtang uban nila. Mahimong nakahuman ka og eskuwela ug maayo ang imong trabaho karon.

Apan tungod sa maong hitabo, lisud ang imong pagpuyo uban sa imong apohan.

Apan taliwala ning tanan, angay nimong hunahunaon nga bisan unsa pa man siya, imo gihapon siyang amahan. Bisan unsaon og bali-bali ang kalibutan, ang kamatuoran magpabilin ug di matuis.

Lisud man tuod kining buhaton tungod sa nasinati nimong mga "kasakit" nga resulta sa pagkabungkag sa inyong pamilya, apan angay pa gihapon nimo siyang pasayluon isip imong amahan.

Sakto ang tambag sa imong apohan ug ubang paryente kanimo nga dawata og balik ang imong amahan kay matinud-anon man kaha ang iyang pagpangayo og pasaylo kanimo.

Pinaagi sab sa imong pagpasaylo niya, magmalinawon ang imong hunahuna.

Timan-i nga way maayong kapaingnan ang paghambin og kaligutgot sud sa kasingkasing, ilabi na nga imo siyang amahan.

Noy Tikyo

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph