DEAR Noy Tikyo,
Tawga lang ko'g Vincent, minyo, 40. Duna nay mga anak.
Ang akong suliran bahin sa usa ka babayeng dalaga nga tawgon lang nato og Charmaine. Sa una pa nako siyang nakita, ganahan na gyud ko niya, ilabi na sa iyang hitsura ug pamayhon.
Apan ang ako, di gugma, apan admiration lang.
Ning bag-o, nagka-istorya mi ug akong gisultihan siya nga naka-admire ko niya. Mikatawa lang siya ug nagpasalamat kanako.
Apan walay dautan kong hunahuna ngadto niya kay nasayud man kong minyo ko ug dunay pamilya.
Nasayud ko sa akong limitasyon, kay gimahal nako ang akong pamilya. Di sab ko gustong mawala sila kanako.
Bisan og gihatagan ko sa babaye og contack number, apan wala nako ni ibutang sa phone book sa akong cellphone kay di ko gusto nga duna mi communication.
Naa poy higayon nga balibaran ko siya, ilabi na kon iya kong imbitahon sa uban niyang mga aktibidad.
Apan di ko kalikayan nga kon magkahimamat mi, grabe ang akong pag-admire ning bayhana.
Ang akong pangutana, Noy, sala ba nga mo-admire ko og babaye bisan og minyo ko? Nakasala ba ko sa akong kaminyuon?
Vincent
*****
Vincent,
Ang admiration di baya sala. Anybody can admire to anyone bisan pa og duna nay kabilinggan sa kinabuhi.
Way namugna nga sala sa pagdayeg lang o pag-admire lang sa ka-guwapa ug ka-guwapo sa usa ka tawo kay normal man lang kini nga pagbati.
Maayo baya ang pag-admire sa creation sa Ginoo, di lang sa kinaiyahan apan sa tawo mismo.
Ug ang pagdayeg sa kamugnaan sa Ginoo, ikalipay kini Niya kay Iya ning gihimo aron nga kitang mga nilalang magmalipayon usab.
Busa wad-a sa imong hunahuna nga nakasala ka sa imong pamilya kon mo-admire ka og tawo, sama sa babaye nga imong nakaila.
Unless kon mo-go beyond ka na sa imong admiration unya magtinguha ka nang makigrelasyon ngadto kaniya. That's the time nga makasala ka na.
Mas maayo sab nga gihatagan nimo og limitasyon ang pagpakigsuod mo niya. At least nasayud ka kon asa ka lang kutob sa imong pagpakiglambigit ning bayhana aron nga malikay ka sa pagpakasala.
Kay ang tentasyon baya naa ra kanunay sa atong palibot. Busa mas maayo nga ikaw mismo ang naglikay aron nga mahilayo sa tentasyon.
Noy Tikyo