Villareal: Mosayaw sa tugtog si Mayor Rody

HANGTUD karon, dili pa gayud nato mabasa ang huna-huna ni Mayor Rody Duterte bahin sa hagit kaniya nga padaganon pagkapangulo sa nasud sa 2016. 

Apan ning ulahing mga adlaw, usa ka higayon si Mayor Rody nag-ingon "sayawon nato ang tugtog kon dunay lugar alang kanako." 

Panahon lamang gayud ang atong agdon, konsiderahon nga naa lamang sa kamot sa Mayor ang desisyon.  

Kitang mga Pilipino wala nay pagduha-duha nga kon mosalmot si Mayor Rody sa natad sa pagka-pangulo pilion gayud nato siya ilabi na kadtong buot og kausaban sa kahimtang sa nasud.

Kaniadtong milabay'ng Lunes kanus-a gipahigayon ang katapusantg State of the Nation Address kun Sona ni Pangulong PNoy gigraduhan ni Mayor ang presidente sa gidak-on nga napulo, naa kini sa 7.5. Maayo na kini nga grado.

Apan nakasaway ang mayor tungod kay wala gayud natubag sa kagamhanang Aquino ang tinuod nga suliran sa nasud karon. 

Sa tinuod lang, nahinabi na sa mayor ang mga sama niyang nangalagad sa lokal nga pangagamhanan. Buot pasabot mga mayor ug mga gobernador, ug tanan nag-ingon druga ang ang hinungdan ngano nga dili maayo ang kahimtang sa nasud.

Tinuod ni, Bay, bisan og unsaon pa ipanghambog sa pangulo nga kompleto ta sa mga armas aron bugnu-on ang kapobrehon, apan kon dunay usa ka suliran nga wala mahatagi'g solusyon dili gayud nato makab-ot ang gidamgong kaayuhan sa nasud ug sa katawhan.

Matud pa gani ni Mayor nga ang kahusay ug kaangayan mao ang ugat sa maayong kondisyon sa ekonomiya. Bisan unsa kita ka adunahang nasud apan kon ang nasud naputos sa sulirang kriminalidad, ang makaluluoy mao ang nagpuyo dinhi ug labaw sa tanan ang kaugmaon sa atong umaabot.

Bisan pa tuod og walay desisyon si Mayor Rody sa hangyo-hagit alang sa presidential election 2016 apan dako na kaayo og kadaugan sa katawhang Pinoy kon ang atong pilion nga pangulo nakamuntar sa samang prinsipyo kang Mayor Rody ilabi na ang tinguha alang sa umaabot nga henerasyon. 

Lipay na kaayo kita ug labaw sa tanan LIPAY SI MAYOR RODY, damgo kini niya kaniadto pa. Wala siya magdamgo nga mahimong presidente sa nasud apan damgo niya ang sama sa gidamgo natong kahapsay ug kahamugaway.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph