1 positibo sa drug test sa CPDRC staff

GIPAUBOS sa suprise drug test ang jail ug blue guards, administrative staff, janitors ug job order (JOs) employees sa Cebu Provincial Detention and Rehabilitation Center (CPDRC) niadtong Sabado sa buntag, usa ka JO ang positibo.

Lakip sa gipaubos sa drug test mao ang duha ka mga sakop sa Philippine Drug Enforcement Agency (PDEA) 7 nga nag-atiman sa duha ka K9 dogs sa pasilidad.

Sigun sa Cebu Provincial Anti-Drug Abuse Office (CPADAO) nga nihimo sa drug testing, usa ka JO nga kawani ang positibo sa pagamit og shabu apan kinahanglan pa hinuon kining ipaubos sa confirmatory test.

Matod ni CPDRC assistant warden, Audesti Miguel, dili na angayang ikahibulong sa mga personnel ang pagpahigayon og drug test sanglit “required” kini ubos sa mga lagda sa Civil Service Commission.

Tungod kay JO ang nagpositibo sa drug test, gitumbok ni Gob. Hilario Davide III nga wa na’y rason nga magpabilin pa kini sa trabaho.

Gihangop hinuon sa gobernador nga usa lang sa mga kawani sa prisohan ang nagpositibo sa pagamit og drugas dungan sa panghinaot nga mamintinar nga wala mogamit og druga nga kawani sa pasilidad.

Kon si CPADAO executive director, Ivy Meca, ang pabut-on, mas gusto niya nga matabangan sa Kapitolyo sa ilang rehabilitasyon kadtong mga mag-po­­sitibo sa drug test.

Matod niya, mas maayo nga ma-assess kini ug tarong aron masukod kon grabe ba o dili ang iyang paggumon sa bisyo.

Ang labaw sa Civil Security Unit sa Kapitolyo nga si Bobby Legaspi nipatawag ug tigum alang sa tanang kawani sa prisohan, sa wala pa gipahigayon ang pagpaubos kanila sa drug test.

Sigun sa assistant warden, duna gyuy tulubagon kadtong mga nag-positibo sa drug test apan giklaro niya nga kinahanglan gihapon kining moagi og proseso.

“The provincial government has policies on how to deal with such situation,” padayag ni Miguel.

Kinahanglan pa hinuong ipaubos sa confirmatory test ang tanang urine sample nga nakuha atol sa drug test sa mga kawani sa prisohan.

Una nang namahayag si Gob. Hilario Davide III nga sulod niining buwana, duna nay mga gwardiya sa pasilidad nga masilotan ug suspensiyon human masuta sa imbestigasyon nga nitabang sa pagpalusot ug mga kontrabando. (AZDL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph