MGA 19 ka pamilya ang magsaulog sa Pasko nga walay poluy-anan human niulbo ang kalayo niadtong Martes, Disyembre 13, alas 12:30 sa tungang gabii sa Lapaz 2, Kolambog, Barangay Lapasan, dakbayan sa Cagayan de Oro.
Mokabat ngadto sa P1.5 milyones ang natalang damyos human nga gilamoy sa kalayo ang 19 ka mga panimalay.
Sa inisyal nga imbestigasyon, nagsugod ang kalayo sa balay nila Wilbert ug Arlene Siesmondo ug mikaylap sa kasikbit nga mga panimalay.
Gibutyag ni Arlene sa pakighinabi sa SunStar SuperBalita nga nakamata na lamang sila nga kusog na ang kalayo ang kalayo hinungdan nga nangita kini sila og paagi aron nga makagawas mao nga pulos sila nakaangkon og mga paso diha sa ilang mga kamot ug bukton.
“Nakamata na lang mi dako na ang kalayo, sa kuryente, wire naa man nakakita nga nagsila-sila, nakamata mi pero na paso-paso bag-o pa gayud mi nakatulog, wala gayud mi nahipos tapot lawas ra gayud, nakaabli mi didto sa silong didto mi nangagi,” pahayag ni Arlene.
Sa inisyal usab nga imbestigasyon sa tinugyanan sa Bureau of Fire Protection sa City Fire District nga nagsumikad ang kalayo sa dapit sa bintana ilabi na sa second floor nga bahin sa panimalay sa Siesmondo apan wala pa nila matumbok kung unsa ang hinungdan niini.
Samtang gibutyag usab ni Erlita Mamat sa Barangay Disaster Risk Reduction Management Council, medic ug Barangay Nutrition Scholar nga mokabat ngadto sa 109 ka mga indibidwal ang apektado sa maong sunog, 19 ka mga panimalay ang totally damaged, five sharers ug 14 ka renters ang natala sa pagsulat niini nga balita.
“Ang home owners nga totally damaged gayud is 19, 17 pa ang among na-interview, ang total sa individuals as of karon is nadugangan na siya og 5 so 109 na kay 104 man to ang una, duna ta’y upat nga nakaangkon og second degree nga burn,” pahayag ni Mamat.
Sa pagkakaron, padayon pa ang tinugyanan sa BFP sa imbestigasyon samtang ang mga biktima ang kasamtangang nagpasilong sa covered court sa Barangay Lapasan kinsa padayon usab nga nangayo og tabang gumikan kay halos kanila ang tapot lawas lamang.