PADAYON ang imbestigasyon sa kapolisan sa nahitabong pagpangdagit sa duha ka mga dalagita diha sa Barangay Iponan, dakbayan sa Cagayan de Oro.
Ang duha ka mga dalagita, nga itago sa ngalan nga Lisa ug Rina, ang pulos tinun-an sa Grade 8 sa Iponan National High School.
Mismong ang principal sa maong tunghaan nikumpirma niini tungod kay misaysay si Rina sa nahitabo kanila.
Gisaysay ni Rina ngadto sa principal nga niadtong Martes niaging semana, gikan sila nanan-aw og kalingawan sa Barangay Iponan gumikan kay kasaulogan man sa kapistahan apan dihang pauli na sila kuyog ni Lisa gihunongan sila sa usa ka panel nga adunay sakay nga upat ka mga lalaki.
Gikatingala sa mga biktima nganong sa kalit nga hitabo misugot sila nga mosakay sa panel ug wala na masayod asa nakapaingon.
Giingong gipainom sila og duha ka long neck sa ilimnong makahubog, samtang nakita ni Rina nga gi-injectionan si Lisa.
Namatikdan sa mga biktima nga taliwala sa kangitngit mipaingon sa Bukidnon ang panel ug misulod sa usa ka bunk house.
Didto nakita ni Rina nga aduna sab laing mga batan-on nga susama kanila nga luspad na kaayo og hitsura nga nagsige og hilak.
Nasaksihan sab ni Rina nga gitabangan og lugos si Lisa sa upat ka mga lalaki ug giangkon niining lakip siya nga nalugos.
Dihang nakamata si Lisa atol sa pagkakuyapi nagdesisyon silang mosibat ug nakakita og maagian ug nanagan paingon sa kasagbutan.
Adlawang Biyernes nakaabot ang duha ka mga dalagita sa terminal sa Malaybalay ug nakauli nga luwas dinhi sa dakbayan. Gipa-blotter na usab ang maong insidente.
Sa pagkakaron, ang kapolisan sa Police Station 8 wala pay pamahayag kalabot sa kaso gumikan kay confidential kini ug gisunod na kini sa ilang mga sakop aron maimbestigahan kinsa kining mga responsable.