DUHA ka mga driver sa motorsiklo ang nakabsan sa kinabuhi human nagsungag ilang gimanehong motorsiklo Dominggo sa kaadlawon sa San Isidro, lungsod sa Talakag, Bukidnon.
Giila ang mga biktimang driver nga mao sila si Elmer Japos, 59, taga San Antonio ug si Jim Valdehuesa, 32, taga Macanhan, Carmen, dakbayan sa Cagayan de Oro.
Samaran sab ang angkas ni Valdehuesa nga iyang mag-inahan nga giilang sila Mary Rose ug 7-anyos nga anak nga si Kesha.
Ang mga biktima gidala sa Talakag Provincial Hospital apan gibalhin sa Northern Mindanao Medical Center (NMMC).
Si Aahron Torres gikan sa Talakag Rescue Team nibutyag nga mao na lamang ilang nadawat nga report nga adunay bangga nga nahitabo ug ilang naabtan nga nagbuy-od ang duha ka mga driver nga nakabsan sa ilang mga kinabuhi.
Nasayran nga pauli na denhi sa siyudad ang pamilyang Valdehuesa ug pauli sab sa San Antonio sa maong lungsod si Japos dihang kusog ang dagan ni Japos ug didto mibangga sa katabo nga si Valdehuesa.
Dili mahitsura ang duha ka mga motorsiklo gumikan sa kakusog sa impact sa bangga.
Ang igsuon ni Japos namahayag nga gikan nag-inom ang biktima ug aminadong lango sa ilimnong makahubog kini nga nagmaneho.
Sa pagsulat ning balita, ang mag-inahan padayon pa nga giobserbahan sa mga doktor sa NMMC ning panahona.