BABAYE gitigbas sa iyang bayaw nga nasuko kaniya tungod sa iyang pagsumbong sa iyang bana nga nanghagad kini kaniya og sex.
Ang maguwang nga si John (di tinuod niyang ngan) nikomprontase sa iyang manghod nga si Bravo (di tinuod niyang ngan), 39, niadtong Lunes sa gabii, apan ang suspek wa magtingog.
Wa mahibaw-i ni Lena nga nasuko kaniya ang iyang bayaw sa iyang gibuhat.
Niadtong Martes sa buntag, nisulod si Bravo sa balay sa magtiayon sa Sityo Bugna, Brgy. Jaclupan, dakbayan sa Talisay human makabiya si John.
Matod ni PO3 Stephen Sefuesca sa Talisa police nga gikomprontase ni Bravo si Lena tungod sa iyang pagsumbong sa iyang bana.
Didto nahitabo ang mainit nga panaglalis nila ni Bravo ug Lena.
Nipunit og sundang si Bravo dayon nitigbas sa ulo ni Lena.
Si Lena nga nagkadugo gibiyaan ni Bravo.
Daling gidala si Lena sa iyang mga kabanay sa tambalanan samtang si Bravo nasikop sa mga tawo sa dapit ug gitugyan ngadto sa kapulisan.
Nagselos
Laing babaye naangol usab human dunggaba sa iyang kapuyo tungod sa grabeng selos sulod sa ilang balay sa sitio Palm Lodge, Barangay Tabunok sa mao nga dakbayan kagahapon sa kaadlawn.
Si Lizelle (di tinuod nga ngan) 25, nasamdan human dunggaba ni Pilo, 36, taga dan F. Llamas, Punta Princesa, dakbayan sa Sugbo.
Si PO3 Sefuesca nibutyag nga base sa ilang imbestigasyon, nag-inom og ilimnung makahubog si Lizelle ug Pilo uban sa ilang mga higala.
Apan sa ilang pagpamauli, nagkalalis sila si Lizelle ug Pilo tungod kay nagselos ang lalake sa iyang nadunggan nga nagsige og “I love you” sa iyang cellphone ang babaye.
Matod pa nag-ilis si Lizella sa ilang kwarto dihang nikuha og kutsilyo si Pilo dayon nisulod ug gidunggab ang babaye sa makadaghang mga higayon.
Nisibat si Pilo biniyaan si Lizella sa ilang kwarto nga nagkadugo.
Ang mga silingan na nila maoy midala kang Lizelle sa tambalanan.
Si Pilo wa magdugay nitahan ngadto sa ilang silingan nga pulis nga si PO1 Merlinda Ferrer.