2 ka hepe, 3 ka pulis patyon

GIPALUYOHAN sa dakong drug group sa norte sa Sugbo ang planong pagpatay sa hepe sa Danao City police station ug Liloan police station.

Ang mopatay unta sa duha ka mga police official mao sila si Jepe Rosal ug Roque Almerez, alyas RR Alvaro.

Gawas sa duha, laing tulo ka mga pulis sa Danao City giingong patyunon usab.

Si Rosal nadakpan sa ginukdanay tali sa kapulisan niadtong Lunes sa gabii samtang si Almerez napatay sa kapulisan niadtong Martes sa hapon sa giingong pinusilay sa Bgry. Pulangbato, dakbayan sa Danao.

Tungod ning mao nga kasayuran, gimandoan ni Sr. Supt. Rey Lyndon Lawas ang Provincial Intelligence Branch (PIB) sa Cebu Provincial Police Office nga mohimo og lawom nga imbestigasyon kinsa kining grupo.

Nasayran nila ni Lawas nga tag P100,000 ang patong sa ulo nila ni Sr. Inspector Alejandro Batobalonos, hepe sa kapulisan sa Danao, ug kang Chief Inspector Franco Rodolf Oriol sa Liloan police station.

Sa impormasyon nga nakuha ni Lawas nga human na gipanid-an sa ilang mga lakaw sila si Batobalonos ug Oriol sa grupo nilang Rosal ug Almeres.

Ang pag-ambush na lang ang kuwang ug kon wa pa sila madakpi, posibling gibirahan na ang maong mga chief of police.

“Nakompleto na unta ang casing aning mga target police officers. It’s just a matter of implementing. It’s fortunate enough nga medyo naunhan ni sila” matod ni Lawas.

Tungod niining maong impormasyon, nipagawas dayon og kamandoan ang hepe sa Police Regional Office 7 Chief Supt. Noli Taliño sa tanang chief of police sa Central Visayas ug mga personnel nga ipatuman ang siguridad sa ilang kaugalingon.

Nagduda ang PRO-7 nga daghan karon sa mga nalambigit sa illegal nga drugas nga mobawos sa kapulisan nunot sa kadaghan na sa nangawala kanila gumikan sa hugot nga kampanya sa kapulisan batok sa drugas.

Wa usab nila isalikway ang kalambigitan ni Alvaro Alvaro, alyas Barok, nga nabilanggo na sa Cebu Provincial Detention and Rehabilitation Center.

Siya pa gihapon ang giila nga labing dako nga drug player sa lalawigan sa Sugbo.

Ilang giisip nga silang Batobalonos ug Oriol maoy tunok sa ilang negosyo sa illegal nga drugas sa habagatang bahin sa probinsya human mangasikop ug nangamatay ang ilang mga drug player.