GIPAUBOS na sa preventive suspension ang duha ka mga jail guard sa Cebu Provincial Detention and Rehabilitation Center (CPDRC) nga maoy nag-duty atol sa pag-ikyas niadtong usa ka inmate nga gi-admit sa Vicente Sotto Memorial Medical Center (VSMMC).
Gitug-an sa labaw sa Committee on Discipline and Investigation sa Kapitolyo nga si Atty. Orvi Ortega nga pormal na nilang nadawat ang reklamo ni CPDRC acting warden Gil Macato batok sa mga jail guard nga silang Armando Dinglasa ug Elvin Baysac.
Si Dinglasa maoy nagbantay sa inmate nga si Efren Lariosa dihang niikyas kini niadtong Nobiyembre 26 sa buntag sud sa VSMMC.
Giingong niduaw si Dinglasa sa iyang pag-umangkon nga na-admit sab sa samang tambalanan hinungdan nga nabiyaan ang piniriso.
Ang laing gwardiya nga si Baysac gireklamo ug apil tungod sa kapakyas niini pag-report dayon sa hitabo human siya nipuli og duty ni Dinglasa.
Matod ni Ortega nga napirmahan na niya ang kamanduan alang sa pagpatubag sa duha ka mga jail guard nga gireklamo samtang dunay laing order alang sa ilang preventive suspension samtang magpadayon ang imbestigasyon batok kanila.
Kahinumduman nga si Lariosa mieskapo niadtong Nobiyembre 26 samtang anaa siya sa VSMMC diin gi-admit alang sa iyang operasyon sa sakit nga cancer nga iyang gihambin apan nadakpan siya og balik niadtong Nobiyembre 28 didto sa lungsod sa Minglanilla.
Human nadakpan ang priso nga may stage 4 nga cancer gisulod siya sa bartolina isip silot sa iyang pag-eskapo.