DATU ODIN SINSUAT, Maguindanao Province -- Wala pa mailhan ang duha ka patay nga lawas sa tawo nga nakaplagan, alas 8:20 sa buntag niadtong Biyernes.
Si Maguindanao Provincial Police Office Director Senior Superintendent Nickson Muksan nagsulti nga nakaplagan sa mga sibilyan ang duha ka patay nga lawas sa tawo nga nagbuy-od daplin sa kalsada didto sa Barangay Dinaig, Datu Odin Sinsuat.
Dali nga gitawagan sa mga barangay opisyal sa lugar ang mga pulis ug sundalo nga dali sab nga nagresponde ug gihiling ang mga patay nga lawas.
Walay samad pinusilan o kaha dinunggaban ang duha ka patay nga lawas gawas lamang nga gibatan og pisi ang ilang mga kamot ug tiil unya gipansakan og panyo ang ilang baba.
Pulos mga lalaki ang mga biktima, 5'4 ang gitas-on, gibanabana nga gikan 25 hangtud 30 anyos ang pangedaron, naka-pantalon og maong, naka t-shirt og puti ug brown ug itumon ang ilang pamanit.
Dako ang pagtuo ni Datu Odin Sinsuat Mayor Datu Ombra Sinsuat nga posibleng gipatay sa laing lugar ang mga biktima ug gilabay lamang sa Barangay Dinaig.
Gipangtuok ang mga biktima nga maoy hinungdan sa ilang kamatayon.
Ang kapulisan sa Datu Odin Sinsuat padayon nga nag-imbestiga sa hitabo aron mailhan ang mga biktima ug motibo sa pagpatay kanila.