USA ka lola ug dalaga nabiktima sa budo-budol gang sa managhaling insidente sa Cagayan de Oro ug Bukidnon.
rNadala sa wala mailang suspetsado ang dakong kantidad sa kwarta ug mga mamahalong butang ni Marilou Binayao, 61, minyo, taga Macasandig ning dakbayan.
Ang pagpangilad nahitabo niadtong niadtong Martes, Disyembre 13, alas 11:31 sa buntag diha sa Lapasan ning dakbayan sa Cagayan de Oro.
Sa nahipos nga report gikan sa Police Station 3 sa Agora, gikabutyag nga samtang anaa sa Divisoria si Binayao kalit lamang kining giduolan sa wala mailang babaye ug nakighinabi kaniya.
Sa dihang nakuha na suspetsado ang pagsalig sa biktima gisugdan na niini ang pagpangilad pinaagi na usab sa pagbilin sa pekeng binandol nga kwarta ug nahatag sa biktima ang iyang mahalong relo, cellphone nga Samsung J5, earrings ug singsing gani dili pa igo nag-withdraw pa kini og P24 mil sa banko sa Lapasan.
Human nga nakuha sa suspek ang mga mahalong gamit sa biktima dali dayon kining mipalayo sa maong dapit ug nasuta sa biktima nga peke ang mga sulod nga giingong kwarta.
Samtang, laing biktima usab nga si Merian Naca, 21, dalaga nga taga Libona, Bukidnon ang nagpatala sa kapolisan.
Giingong nagpahulay lamang sa Mac Arthur’s Park si Naca ug giduolan sa wala mailang suspek nga buot magpauban sa pagpalit og camera apan kalit lamang kining nahanaw sa dihang iya na nga nahatag ang cellphone niini nga nagkantidad og P11 mil.
Gibinlan kini og ginunting nga mga papel diin una nga gipatoo nga binandol kini nga kwarta hinungdan nga nisalig ug gipahulam ang mahalon niini nga cellphone sulod sa usa ka fastfood apan wala na mibalik.
Nasayran nga niadtong milabay nga bulan nasikop ang iladong suspetsado sa budol-budol nga si Hernanie Rubio, 38, minyo, residente sa Tulay Semento, Agora, Lapasan ning dakbayan kinsa aminado sa sayop nga binuhatan gumikan sa kalisod.
Sa pagkakaron, nakatala na sa buhatan sa kapolisan ang maong insidente.