COTABATO CITY - Gituohan sa kapulisan nga naunay ang duha ka mga lalaki nga namatay human mibusikad ang bomba nga gidala alas 3:48 sa kaadlawon niadtong Biyernes.
Nasayran nga lain pang usa ka tawo ang naangol atol sa hitabo.
Giila ang mga namatay nga sila si Abdullah Mamatanto, 21, ug Abusama Guiamin, 26. Samtang ang nasamdan mao si Katib Mamatanto, 26, mga molupyo sa Barangay Punol Pikit, North Cotabato.
Matud ni Katib nga nagbantay sila og baboy ihalas sa ilang uma didto sa Sitio Kabalokan, Barangay Dasawao, Datu Piang, Maguindanao Province sa diha nga kalit mibuto ang wala matino nga klase sa bomba.
Tungod sa kakusog sa impak sa bomba, sila si Abdullah ug Abusama ang nakabsan dayon sa kinabuhi human mabungkag ang lawas niini.
Grabeng samad sab ang nahiaguman ni Katib nga gidala sa iyang mga paryente ngadto sa Cruzado Medical Hospital ug gibalhin dayon sa Cotabato Provincial Hospital.
Apan duda ang mga opisyal sa militar ug kapulisan nga mga rebelde ang mga biktima nga nabuthan sa ilang dala nga bomba.
Gikanayon ni Maguindanao Police Provincial Office, director SSupt. Agustin Tello nga walay baboy ihalas sa Datu Piang gumikan marshy area ug dili bukid.
Kapulisan sa Datu Piang Municipal Police Station padayon nga nag-imbestiga sa insidente.