MONKAYO, ComVal Province -- Duha ka mga patay'ng lawas ang narekober sa kapulisan ug kasundalohan didto sa Kilometro 56, Purok 4, Barangay Rizal, alas 6:30 sa buntag, Martes.
Segun sa taho sa kapulisan nga nag-alayon ang Monkayo Municipal Police Station, Regional ug Provincial Crime Laboratory sa pagpanguna ni Police Chief Inspector Nolan O. Genova, medico-legal officer ug 25th Infantry Battalion, Philippine Army aron nga kaluton ang gituohang mass grave sa New People's Army.
Kahinumdoman nga usa ka lalaki nga nagpailang miyembro sa NPA ang mitahan ngado sa Monkayo Municipal Police Station dili pa dugay.
Sa pagsukit-sukit sa awtoridad, gidetalye niini ang duha ka patay'ng lawas nga gilubong sa nasangpit nga lugar. Ang patay'ng lawas gituohang usa ka babaye ug lalaki.
Ang duha ka mga nahibiling parte sa lawas sa mga biktima gidala ngadto sa Angel Funeral Home sa Barangay Poblacion, Monkayo.
Hangtud sa pagsuwat niining balita, padayon pa nga giila sa kapulisan ang mga biktima. (Rockyben S. Catisay)